رانچی، 11/ستمبر (ایس او نیوز /ایجنسی) جھارکھنڈ کے وزیر اعلیٰ ہیمنت سورین نے منگل کے روز چمپئی سورین کے علاقے میں ایک بیان دیتے ہوئے کہا کہ ریاست میں اراکین اسمبلی اور پارلیمنٹ کو خریدنے اور پارٹی توڑنے کی کوششوں کے لیے مرکزی وزیر سرگرم ہیں۔ انھوں نے الزام عائد کیا کہ بی جے پی اراکین کو خریدنے اور سیاسی سازشیں کرنے میں ملوث ہے، جس کا مقصد ریاست میں سیاسی استحکام کو نقصان پہنچانا ہے۔ ہیمنت سورین نے اس کارروائی کو غیر جمہوری قرار دیتے ہوئے بی جے پی کی شدید مذمت کی۔

وزیر اعلیٰ نے جھارکھنڈ کے سابق وزیر اعلیٰ اور اپنی کابینہ میں ساتھی رہے چمپئی سورین کے اثر والے کولہان ڈویزن کے چانڈل میں ایک جلسۂ عام سے خطاب کرتے ہوئے کہا کہ ’’مرکزی حکومت کے وزیر اور بی جے پی لیڈر ہماری ریاست میں اراکین اسمبلی و اراکین پارلیمنٹ کو خریدنے کے لیے گھوم رہے ہیں۔ یہ پیسے کی طاقت پر پارٹی کو توڑتے ہیں۔ کبھی بولتے ہیں کہ اتنے اراکین اسمبلی ہمارے ساتھ ہیں، تو کبھی کہتے ہیں اتنے اراکین پارلیمنٹ ہمارے ساتھ ہیں۔‘‘

ہیمنت سورین نے بی جے پی کے خلاف حملہ آور رخ اختیار کرتے ہوئے کہا کہ عوام ان کو منتخب نہیں کرتی، یہ لوگ پیسے سے حکومت بناتے ہیں۔ ریاستی عوام کو ایسے لوگوں کو سبق سکھانے کے لیے تیار رہنا چاہیے۔ ایسا لگتا ہے کہ پیسہ چھاپنے کی مشین ان لوگوں نے گھر میں رکھ لی ہے اور سوچتے ہیں کہ اس کی بدولت پورے ملک پر قبضہ کر لیں گے۔ انھوں نے مزید کہا کہ ’’ہم نے جب 2019 میں حکومت بنائی، اس کے دوسرے دن ہی اسے گرانے کی سازش رچی جانے لگی۔ حکومت بننے کے بعد دو سال تک ہم کووڈ کے چیلنجز سے نبرد آزما رہے اور اس کے بعد دو سال تک مخالفین نے ہمارے پیچھے ای ڈی-سی بی آئی لگا دی۔ ہمیں لگاتار پریشان کرتے رہے۔ انھیں پسند نہیں ہے کہ میں ریاست کے غریبون، ضعیفوں، خواتین اور نوجوانوں کے لیے کام کروں۔‘‘

جھوٹے الزامات میں جیل رسید کرنے کی بات کا تذکرہ کرتے ہوئے وزیر اعلیٰ سورین نے کہا کہ ’’ان کو معلوم نہیں ہے کہ یہ بہادروں کی زمین ہے۔ ہم گولی بندوق سے بھی نہیں ڈرتے تو جیل کا ڈر دکھا کر ہمارا کیا بگاڑ لیں گے۔‘‘ مرکزی حکومت پر جھارکھنڈ کے ساتھ سوتیلا سلوک کا الزام عائد کرتے ہوئے سورین نے کہا کہ ہماری ریاست میں منریگا کے تحت مزدوروں کو پورے ملک میں سب سے کم مزدوری دی جاتی ہے اور یہ پیسہ بھی طویل مدت سے روک کر رکھا گیا ہے۔